تزه ایلده کوهنه یولداشیم هادی وحیدی جینابلاریلا زنگانین بویوک شاعیری عباس آقا بابایی نین بایرام گوروشونه گئتدیک. (۶/۱/۸۸) بئش ایل اولاردی کی تاسفله بو ایستکلی کیشیدن غافیل اولموشدوم. یادیمدان چیخماز بئش ایل بوندان قاباق عاصم اسدی باشقا بیر عزیز و شاعر یولداشیملا اونلارین ائولرینه گئتمیشدیک. هوشنگ جعفرینی ده اورادا گوردوک. بایرام گوروشو گوزل بیر شعر مجلیسینه دونموشدور. آللاه رحمت ائله سین حسین منزوی نی اوندا هله الیمیزدن گئتمه میشدی. هامی میز اورادان دوردوق گئتدیک منزوی نین گوروشونه. بیر باشقا شعر مجلیسی ده منزوی نین حضوروندا قورولدو. شعر منه چوخ یولداشلار تاپیب تاپاجاق. عباس آقا بابایی اونلاردان بیری دی. بو ایل منه وئردیگی "آییق گئجه لر" شعر کیتابی بویوک بیر بایراملیقیدی. بوندان قاباق بابایی دان گلیره م – سئچیلمیش شعرلر – زنگان انتشاراتی – 1377 و ائله اوجور رد خون بر سنگ – مجموعه شعر فارسی – یئنه ده 1377 ایلیند ه زنگان اینتیشاراتی توسط ایله چاپا یئتیشمیشدی.آییق گئجه لر سویلرین ( عباس بابایی) اوچونجو کیتابیدی. بو کیتاب یوز ورقده مین ایکی یوز تومن قیمت ایله پینار اینتیشاراتیندا چاپا یئتیشیب."یؤل" آییق گئجه لر دن بیر گوزل شعریدی کی سیزی اونون اوخوماسیندا شریک ائلیرم.
بورخولوب دره دن
دیرماشیب داغا
داراشلیق بیر یولدور
دولانبادولان
اوزاقدیر , چتین دیر, ائله بیل منیم-
اوره ک نیسگیلیمدیر , ایاق زنجیریم-
بیر یولدور , هم یاخین هم اوزاقلارا
دولانیب سس کیمی اوجا داغلارا
انیره م
چیخیرام
دولانبادولان
فیکیرلشدیم گوردوم بو گون آی توتولماقدان سووای آیری بیر موناسیبتدهده یازماق اولار .اودا آنا دیلینین گونودی. بو "آی" دیمک اولار چوخداندی توتولوبدی – سیز اوخویون بوغولوبدی – آمما تقصیرینی دای یئرین بوینونا ییخماق اولماز. بو آیین توتولماقی ، یئر گونون قاباقیندا دایانماقدان دؤیؤل. کیمدی یا نمهدی اوکی گئجهلریمیزین ایشیقلیقین آلیر!؟ پیس درددی دوغوردان بو کی دای اوز دیلیمیزده یازیپ اوخوماق بیزه قولونج گتیریر. باعیثین اؤیی ییخیلسین.